Мәулен Әшімбаев отандық бизнестің мемлекеттік қаржыландыруға тәуелділігіне алаңдаушылық білдірді

Сенат Төрағасы Мәулен Әшімбаев Қазақстан бизнесінің мемлекеттік қолдау құралдарына шамадан тыс тәуелді болып қалғанын атап өтті. Оның пікірінше, бүгінгі таңда кәсіпкерлік сектордың басым бөлігі мемлекеттік бюджетпен тікелей байланысты болып отыр.

Сенатта өткен Үкімет пен Жоғары аудиторлық палатаның 2025 жылғы республикалық бюджеттің атқарылуы туралы есебін талқылау кезінде сенатор Шәкәрім Бұқтығұтов маңызды мәселе көтерді. Депутаттың айтуынша, 2025 жылы кәсіпкерлікті қолдауға шамамен 195 млрд теңге бөлінгенімен, оның 96 пайызы кепілдендіру мен субсидиялауға бағытталған. Алайда бұл қаражаттың экономиканың өсуіне тиісті деңгейде мультипликативті әсер етпей отырғаны байқалады.

Өз кезегінде, Премьер-Министрдің орынбасары – Ұлттық экономика министрі Серік Жұманғарин 2022-2025 жылдар аралығында 9 мыңнан астам жоба тексеріліп, оның тек 145-інде ғана заңбұзушылық анықталғанын жеткізді. Ол кәсіпкерлердің салық түсімдерін арттыру, жұмыс орындарын сақтау және еңбекақы қорын ұлғайту сияқты негізгі талаптарды орындап жатқанын алға тартты.

Сенат Төрағасы Мәулен Әшімбаев мемлекеттік қолдау тетіктерінің тым көп екенін және олардың тиімділігін қайта қарау қажеттігін мәлімдеді. Қазіргі таңда бизнеске қолдау республикалық бюджет, «Бәйтерек» холдингі, әлеуметтік-кәсіпкерлік корпорациялар мен екінші деңгейлі банктер арқылы жүзеге асады.

«Бизнестің мемлекет айналасында шоғырлануы – бүгінгі күннің шындығы. Тендерлер, субсидиялар, пайыздық мөлшерлемелерді төмендету сияқты құралдар көп. Бұл жерде функциялардың қайталануы, әкімшілік шығындардың көбеюі және сыбайлас жемқорлық тәуекелдері орын алуы мүмкін», – деді Мәулен Әшімбаев.

Спикер мәселені шешу үшін бизнеске қолдау көрсететін құрылымдарды оңтайландырып, «бірыңғай терезе» жүйесін белсенді түрде енгізуді ұсынды. Оның пайымдауынша, жасанды интеллектіні қолдану арқылы кәсіпорындарға қажетті мемлекеттік қолдау шараларын автоматты түрде айқындау жүйесін қалыптастыру қажет.