Мәслихаттар мерзімінен бұрын таратылуы мүмкін: Тоқаев Премьер-министр және Құрылтай төрағасымен кеңесті

Президент Қасым-Жомарт Тоқаев барлық деңгейдегі мәслихаттардың өкілеттігін мерзімінен бұрын тоқтату мәселесі бойынша Премьер-министр Олжас Бектеновпен және Құрылтай төрағасы Айбек Дәдебаймен консультация өткізді.

Мемлекет басшысы азаматтардың заңды мүдделерін қамтамасыз ету, жергілікті бюджеттерді бекіту және өңірлердің дамуын бақылау үшін мәслихаттардың толыққанды жұмыс істеуі маңызды екенін атап өтті. Президенттің пікірінше, депутаттық құрамды жаңарту жергілікті өкілді органдардың жұмысын едәуір күшейтеді.

Консультациялар Конституцияның 88-бабының 5-тармағына сәйкес өткізілген. Кездесу барысында Олжас Бектенов пен Айбек Дәдебай мәслихаттардың өкілеттігін мерзімінен бұрын тоқтату мәселесіне қатысты ұсыныстарын жеткізді.

Кездесу қорытындысында Тоқаев айтылған пікірлерді ескере отырып және Конституция талаптарына сәйкес түпкілікті шешім қабылдайтынын мәлімдеді.

Әзірге мәслихаттардың өкілеттігін тоқтату туралы шешім қабылданған жоқ. Сондықтан кезектен тыс сайлаудың өтетіні де ресми түрде жарияланған жоқ.