Мәскеуде Қазақстан азаматын үш күн азаптап, соғысқа баруға мәжбүрлемек болған

Қазақстандық Жазылбек Әжіғалиевті Мәскеуде ресейлік полиция азаптап, соғысқа баруға мәжбүрлеген. Бұл жөнінде оралдық азаматтық белсенді Маруа Ескендірованың сөзіне сүйенген «Уральская неделя» басылымы жазды.

Белсендінің айтуынша, үш баланың әкесі Жазылбек Әжіғалиев былтыр желтоқсан айының басында бауырымен бірге нәпақа табу үшін Мәскеуге барған. Ол жерде клиникаға медицина қызметкері ретінде жұмысқа орналасып, тіркеу рәсіміне өтініш берген. Алайда 18 қаңтар күні көші-қон қызметі құжаттарын алып кетуді сұрағаннан кейін, келесі күні сол мекемеге барған сәтінде ресейлік полицейлер тарапынан ұсталған.

Маруа Ескендірованің сөзінше, Әжіғалиевтің басына қара қап кигізіп, электрошокермен соққан. Оны үш күн бойы учаскеде ұрып-соғып, азаптаған. Осы уақыт аралығында әскери комиссариат қызметкерлері бірнеше рет келіп, оны соғысқа баруға үгіттеп, келісімшартқа қол қоюға мәжбүрлеген.

Белсендінің айтуынша, Әжіғалиев соғысқа барудан үзілді-кесілді бас тартып, өзін Қазақстанға депортациялауды талап еткен. Нәтижесінде 21 қаңтарға қараған түні ол Алматыға ұшатын рейспен елге қайтарылып, бес жылға Ресейге кіруге тыйым салынған.

Қазіргі таңда оның туыстары Қазақстанның мемлекеттік органдарынан ресейлік полицияның әрекетіне ресми баға беруді сұрап отыр. Алайда қазақстандық құқық қорғау органдары бұл жағдайға әзірге пікір білдірмеген.

Маруа Ескендірованің Азаттыққа айтуынша, бауыры қатты күйзеліске түскен және арыз жазудан бас тартып отыр. Ол бұл оқиғаны жария ету арқылы Ресейге жұмыс іздеп баруды жоспарлаған қазақстандықтарға ескерту жасағысы келетінін айтты.