Маска таққан жігіт: "Димаш емеспін деп, ештеңе айта алмаймын"

Мұқтаж жандарға көмектесіп жүрертін «Человек в маске»  Halyq Uni тілшісіне сұқбат берді. Ол көпшілік жиі қоятын сұрақтарға жауап беріп, қайырымдылық жасаумен айналысуға не түрткі болғанын айтты.

Оның айтуынша, маска мен көзілдірік тағып, мұқтаж жандарға көмектесу идеясы 2020 жылы пайда болған. Сол жылы әкесі инсульт алып, өмірінде үлкен өзгеріс болған. Оған қоса халық арасынан шыққан батырлар туралы тарихты жақсы көретінін, қаһармандар туарлы филмдер мен мультфилмдерді көріп өскендіктен соларға ұқсағысы келгенді армандағанын айтты. 

“2020 жылы әкем инсульт алып, дәрігерлер денсаулығы нашарлай беретінін айтты. Сол сәтте өзімді дәрменсіз сезініп, Алладан көмек сұрай бастадым. Қайырымдылық жасау осылай басталды. Бұл мен үшін бетбұрыс болды. Әкемнің денсаулығы түзелді. Жүру, сөйлеу, жазуды – бәрін басынан бастадық. 5 жыл ішінде өзімді іздедім, түрлі салада жұмыс істедім. Қолымда мүмкіндік болса, немен айналысар едім деген сұрақ қойдым. Бұл сұрақтың жауабы – спорт пен қайырымдылық болды,” - дейді ол.

Жалпы көпшілік маска таққан жігіт Димаш Құдайберген болуы мүмкін деген пікір айтады. Өйткені дауысы мен сырт келбетін ұқсатады.  Маска таққан жігіт бұл туралы «Димашпын, Димаш емеспін» деп ештеңе айта алмаймын», деп қысқа қайырды.

Айтуынша, мұқтаж жандар өздері жазып көмек сұрайды. Тіпті әр өңірде ақпарат беріп отыратын еріктілер де бар. Қазақстандықтар арасында қайырымдылық жасап, қаражат аударатындар көп. Шетелдіктер де үнемі қолдап отырады.

Ол елімізде көмекке мұқтаж азаматтың көп екенін айтады. Халық арасында несие алып, қарызға батқандар жиі көмек сұрайды.

“Көмек сұрайтындардың дені қарызға батып жүргендер. Жалпы халқымыздың қаржылық сауаттылығы төмен, біз соған көңіл бөлуіміз керек. Әрине, өмірде әртүрлі жағдай, әртүрлі тағдыр болады. Маска мен көзілдірікті өмірімнің соңына дейін шешпеймін. Кім екенімді ешқашан айтпаймын,” - дейді ол.