Мария Мачадо Дональд Трампқа Нобель сыйлығының медалін табыстады

Венесуэла оппозициясының көшбасшысы Мария Корина Мачадо АҚШ президенті Дональд Трамппен алғашқы жеке кездесуінде оған Нобель бейбітшілік сыйлығының медалін табыстады. Бұл туралы америкалық көшбасшы өзінің Truth Social әлеуметтік желісіндегі парақшасында жазды.

Трамп жазбасында Мария Корина Мачадоны «ерекше әйел» деп атап, онымен кездесуді «үлкен мәртебе» ретінде бағалаған. Оның айтуынша, венесуэлалық саясаткер оған өзі атқарған қызметі үшін Нобель бейбітшілік сыйлығының медалін сыйлаған. Алайда Трамп бұл марапатты ресми түрде қабылдаған-қабылдамағанын нақтыламаған.

Өз кезегінде Мария Корина Мачадо бұл күнді венесуэлалықтар үшін «тарихи сәт» деп атады. Ол Дональд Трамптың Венесуэладағы саяси тұтқындардың бостандығына және ел азаматтарының құқықтарына бейілді екенін, сондай-ақ республиканың АҚШ үшін әлеуетті серіктес бола алатынын түсінетінін айтты.

АҚШ арнайы жасақтарының Каракаста Венесуэла президенті Николас Мадуроны ұстауынан кейін Дональд Трамп Мария Корина Мачадоны елдің жаңа басшысы ретінде қолдаудан бас тартқан еді. Бұған қарамастан, Мачадо жетекшілік ететін қозғалыс 2024 жылғы сайлауда жеңіске жеткенін мәлімдеген болатын.

Қазіргі уақытта Дональд Трамп Венесуэлада уақытша мемлекет басшысы міндетін атқарушы ретінде Делси Родригеспен байланыс орнатқан. Делси Родригес бұрынғы билік тұсында вице-президент қызметін атқарған.

Айта кетейік, Дональд Трамп бұған дейін де Нобель бейбітшілік сыйлығын алуға ниетті екенін бірнеше рет мәлімдеген.