Марат Башимов: Қоғамдық палата – қоғамдық демократияның тиімді институты

Әділдік, теңдік, адам құқықтарын қорғау және қоғамдық институттарды дамыту – Президент Қасым-Жомарт Тоқаевтың саясатының басты қағидаттары. Осы құндылықтарды іске асыруда Мәжіліс жанындағы Қоғамдық палата маңызды рөл атқарып келеді. Бұл туралы Мәжіліс депутаты Марат Башимов «24KZ» арнасындағы өзінің авторлық бағдарламасында айтты.

Депутаттың айтуынша, Қоғамдық палата елдегі демократиялық процестер мен саяси мәдениетті дамытуға елеулі үлес қосып келеді.

«Қоғамдық палата – заң шығару барысында халықтың пікірін ескеретін қоғамдық институт. Бұл – билік пен қоғам арасындағы ашық диалог алаңы. Оның жұмысы – Президент реформаларының табысты жүзеге асуының айғағы», – деді Марат Башимов.

Мемлекет басшысы Қасым-Жомарт Тоқаев пікірталастар көшеде емес, Парламент қабырғасында жүруі керек екенін бірнеше рет атап өткен болатын. Осы бағытта Мәжіліс жанындағы Қоғамдық палата өз миссиясын абыроймен атқарып келеді.

Палата бүгінде Президенттің Жолдауларында көрсетілген стратегиялық бастамаларды, соның ішінде цифрлық трансформация мен жасанды интеллектіні енгізу үдерісін қолдап отыр.

«Жуырда жасанды интеллект туралы заң қабылданды, парламенттік тыңдалым өтті. Қазір Цифрлық кодекс әзірленіп жатыр. Осы процестердің барлығына Қоғамдық палатаның сарапшылары белсенді қатысып жатыр», – деді депутат.

Сонымен қатар Марат Башимов Қоғамдық палата Парламент пен сарапшылар қауымдастығы арасындағы байланыс көпіріне айналғанын айтты.

«Мәжіліс пен Қоғамдық палата арасында сенімді әріптестік қалыптасты. Депутаттар палата мүшелерінің ұсыныстарына ерекше мән беріп, заң жобаларын сол негізде жетілдіріп келеді», – деді ол.

2022 жылы құрылған сәттен бастап Қоғамдық палата жүздеген талқылау өткізіп, маңызды заңдарға түзетулер енгізді. Өңірлерде көшпелі отырыстар ұйымдастырылып, жергілікті өзін-өзі басқару, денсаулық сақтау, сайланған әкімдердің жұмысы, электрсамокаттар мен кальянға қатысты заңдардың орындалмауы, онлайн-курстар мен коучинг нарығының реттелуі секілді мәселелер қаралды.

Марат Башимов қоғам сенімін нығайту үшін заңдардың тиімді орындалуы маңызды екенін атап өтті.

«Заң бар, бірақ орындалмайды. Бұл қоғамның сенімін әлсіретеді. Сондықтан Қоғамдық палата тек заңдарды талқылап қана қоймай, олардың тиімділігін арттыру жолдарын ұсынуы қажет», – деді депутат.

Депутаттың айтуынша, алдағы уақытта Қоғамдық палата бизнес заңнамасын қайта қарау, демографиялық үрдістерді зерттеу және саяси реформалар төңірегінде қоғамдық пікірталастар өткізу бағытында жұмысын жалғастырады.