Маңғыстаудағы сарбаздар өліміне қатысты күдіктілер анықталды: 30-дан астам куәгерден жауап алынды

Маңғыстау облысында өткен әскери жаттығу кезінде орын алған сарбаздардың қаза болу дерегі бойынша ауқымды тергеу амалдары жүргізіліп жатыр. Қайғылы оқиғаның мән-жайын анықтау мақсатында Қазақстан Республикасының Бас прокуратурасы арнайы тексерісті қолға алды.

Жаттығу жиындарында қауіпсіздік шараларының сақталмауы қайғылы жағдайға алып келген. Тергеу органдарының алдын ала болжамы бойынша, жауапты лауазымды тұлғалар тарапынан салғырттық танытылып, метеорологиялық жағдайлар ескерілмеген. Сонымен қатар төтенше сәтте құтқару жұмыстарын ұйымдастыру кезінде де бұзушылықтарға жол берілгені белгілі болды.

Қазіргі уақытта жедел-тергеу тобы оқиға орнын толықтай қарап шығып, іске қатысты 30-дан астам әскери қызметшіден жауап алды. Сонымен бірге, барлық қажетті құжаттамалар мен бейнежазбалар тәркіленіп, іс бойынша 12 сот сараптамасы тағайындалды. Бас прокуратура аталған оқиғаға қатысы бар барлық тұлғалардың әрекетіне толық құқықтық баға беріліп, заңға сәйкес тиісті процестік шаралар қолданылатынын хабарлайды.