Маңғыстаудағы МАЭК-те екі жұмысшы қышқылдан күйік алды

Ақтауда «Маңғыстау атом энергетикалық комбинаты» кәсіпорнында екі жұмысшы күйік жарақатын алды, деп хабарлады «Ақ Жайық» басылымы. Оқиға 23 сәуір күні сағат 10:30 шамасында №1 цехта болған.

Алдын ала мәлімет бойынша, жұмысшылар газтурбиналық қондырғының негізгі конденсаторын тұз қышқылымен жуу жұмыстарын жүргізген. Жұмыс аяқталғаннан кейін жабдықты ажырату кезінде қышқыл ерітіндісі шашырап, олардың беті мен көзіне тиген.

Зардап шеккендер Маңғыстау облыстық ауруханасына жеткізілген. Дәрігерлер олардың жағдайын анықтап жатыр.

Облыстық мемлекеттік еңбек инспекциясы департаменті өкілдерінің мәліметінше, жарақаттың ауырлығы медициналық қорытындыдан кейін белгілі болады. Егер ауыр немесе топтық жазатайым оқиға белгілері анықталса, арнайы тергеу жүргізіледі.

Қазіргі уақытта оқиғаның мән-жайы анықталып жатыр.

Ресми дерекке сәйкес, 2025 жылдың тоғыз айында Қазақстанда өндірісте 934 адам зардап шегіп, оның 133-і қаза тапқан.