Маңғыстауда 5 млн долларға шипалы су орталығы салынады

2026 жылы Маңғыстауда радон көздері орналасқан жаңа термальды курорт салынады. 

Термальды – табиғи түрде жылы немесе ыстық болып келетін суға қатысты қолданылатын ғылыми термин. Бұл сөз көбінесе шипалы су көздері, емдік немесе демалыс орталықтарын сипаттау үшін пайдаланылады.
Жобаның жалпы құны – 5 млн доллар. Кәсіпкер Сауле Жақаева Қытай мен Оңтүстік Кореядан келген инвесторлармен алдын ала келісімге қол қойды, деп хабарлайды Lada.kz

Курорт жыл бойы жұмыс істейтін болады. Онда табиғи ыстық сумен үлкен термальды бассейн, панорамалық қыстық бассейн, толық SPA-орталығы (хаммам, сауна, массаж бөлмелері) қарастырылған. Сонымен қатар 40–50 орындық қонақүй және 15 премиум-вилла салынады. Территорияда мейрамхана, лаундж-аймақ, балалар мен отбасы демалысына арналған аймақтар, саябақ және автотұрақтар ұйымдастырылады.

Кешен бір уақытта 200 қонақты қабылдай алады және 100 адамға тұрақты жұмыс орнымен қамтамасыз етеді. Құрылыс 12–16 айға созылып, курорт 2027 жылы пайдалануға беріледі.

Радон – табиғи радиоактивті газ, ол кейбір ауруды емдеуге көмектесетін шипалы судың құрамында болады. Дұрыс қолданылса, радон көздері курорттық және емдік мақсатта пайдалы.

Жоба Ақтауға Қазақстан, ТМД елдері, Қытай және Таяу Шығыстан туристер тартуға бағытталған.