МӘМС жарнасы 5 есе көтерілмейтін болды

Міндетті әлеуметтік медициналық сақтандыру (МӘМС) жүйесіне төленетін жарналардың шекті мөлшерін төмендету ұсынысы қабылданды. Бұл туралы Денсаулық сақтау министрі Ақмарал Әлназарова мәлімдеді.

Бұған дейін Мәжіліске енгізілген заң жобасында жарна мен аударымдардың жоғарғы шегі 10 ең төменгі жалақыдан (ЕТЖ) 50 ЕТЖ-ға дейін ұлғайтылады деп көрсетілген еді. Алайда Мәжіліс депутаты Ержан Бейсенбаевтың айтуынша, депутаттар жарна шегін жұмыс берушілер үшін 40 ЕТЖ, ал жұмысшылар үшін 20 ЕТЖ деңгейінде белгілеуді ұсынған.

«Депутаттардың ұсынысын толығымен қолдаймыз. Бұл ұсынысты жауапты комитетке тапсырдық», – деді министр.

Еске салайық, 2024 жылдың қаңтарында Денсаулық сақтау министрлігі МӘМС жарналарын есептеу үшін қолданылатын айлық табыстың шекті мөлшерін бес есе арттыруды жоспарлап отырғанын хабарлаған еді. Бұл бастама қоғамда алаңдаушылық тудырған болатын.