$ 469.93 € 541.64 ₽ 5.71

МӘМС қорынан 3,5 миллиард теңге жымқырылған

Абдрахманов Мағжан
03 тамыз 2026, 10:22
МӘМС қорынан 3,5 миллиард теңге жымқырылған Сурет авторы: shutterstock

Қазақстанда Міндетті әлеуметтік медициналық сақтандыру (МӘМС) жүйесіндегі қаржыны жымқыру деректері бойынша 36 қылмыстық іс тергеліп жатыр. Алдын ала есеп бойынша мемлекетке келтірілген шығын 3,5 миллиард теңгеден асты. Бұл туралы Қаржылық мониторинг агенттігі хабарлады.

Агенттік мәліметінше, Түркістан облысындағы Жетісай көпсалалы аудандық ауруханасының лауазымды тұлғалары 20-дан астам жеке кәсіпкердің шотына медициналық қызмет көрсетілмесе де МӘМС қаражатын аударған деген күдікке ілінді. Келтірілген шығын көлемі 501 миллион теңгеден асқан. Іс бойынша екі күдікті қамауға алынған.

Астанада Forte Clinic жеке клиникасының басшысы МӘМС-тен заңсыз қаржы алу схемасын ұйымдастырғаны үшін бес жылға сотталды. Оның сыбайласы – Ұлттық денсаулық сақтауды дамыту ғылыми орталығының қызметкері азаматтарды тіркеуге қатысты өтінімдерді заңсыз мақұлдағаны үшін үш жылға бас бостандығынан айырылды. Тергеу мәліметінше, клиникаға 15 мыңнан астам адам жалған тіркеліп, 79 миллион теңге көлемінде заңсыз қаржы алынған.

Алматы облысында Mydental.kz және «Стоматология Dr. Nurzhanova» клиникаларының басшысы стоматологиялық қызмет көрсету кезінде алаяқтық жасағаны үшін төрт жылға сотталды. Оның мүлкі тәркіленіп, мемлекетке келтірілген 66 миллион теңге шығын анықталған.

Қаржылық мониторинг агенттігінің мәліметінше, тергеу барысында жалпы саны 140 мыңнан астам азаматтың емханаларға заңсыз тіркелгені анықталған. Агенттік МӘМС қаражатын заңсыз иемденуге қатысты өзге де істер бойынша тергеу жалғасып жатқанын мәлімдеді.

#МӘМС #Қаржы жымқыру #ҚМА

Соңғы жаңалықтар