МӘМС болмаса да: 2027 жылдан бастап қазақстандықтар қандай тексеруден тегін өте алады?

2027 жылғы қаңтардан бастап міндетті әлеуметтік медициналық сақтандыру жүйесінде сақтандырылмаған қазақстандықтар емханаға алғаш жүгінген кезде бірқатар тексеруден тегін өтуі мүмкін. Тиісті өзгерістер жобасы «Ашық НҚА» порталында жарияланды.

Жобаға сәйкес, емханаға алғаш келген адамға МӘМС мәртебесіне қарамастан бастапқы медициналық көмектің негізгі түрлері көрсетіледі. Олардың қатарында:

• қан мен зәрдің жалпы талдауы;
• қан қысымын және денсаулықтың негізгі көрсеткіштерін өлшеу;
• электрокардиограмма;
• қандағы оттегі мөлшерін өлшеу;
• флюорография;
• жекелеген қызметтік зерттеулер;
• құрсақ қуысы ағзалары мен бүйректі ультрадыбыстық зерттеу бар.

«Алғаш жүгінген кезде негізгі медициналық көмек тізімінде көзделген қызметтерді алу үшін "сақтандырылған" мәртебесі талап етілмейді», – делінген хабарламада.

Денсаулық сақтау министрлігінің түсіндіруінше, өзгеріс алғашқы медициналық-санитарлық көмек деңгейінде медициналық көмектің бірыңғай топтамасына көшуге байланысты. Жаңа тәртіп тұрғындардың медициналық көмек алуын жеңілдетіп, мемлекет кепілдік берген және сақтандыру есебінен көрсетілетін қызметтердің қайталануын болдырмауға бағытталған.

Жобада емханалардың медициналық ақпарат жүйелеріне қосылған алгоритмдер арқылы азаматтарға автоматты түрде қоңырау шалу мүмкіндігі де қарастырылған. Министрлік бұл науқастарға қажетті ақпаратты жедел жеткізуге және емханалардағы ұйымдастыру жұмыстарының бір бөлігін автоматтандыруға мүмкіндік береді деп отыр.

Құжат әзірге қабылданған жоқ. Жоба бойынша қоғамдық талқылау 23 қазанға дейін жалғасады.