Мақтааралдағы атыс: ер адам көз жұмып, полицей жараланды

Түркістан облысының Мақтаарал ауданында ер адам бұрынғы жұбайының үйіне қарумен келіп, жанжал шығарып, полицейге оқ атты. Құқық қорғау қызметкерлері оны құрықтау кезінде табельдік қару қолдануға мәжбүр болған.

Полиция департаментінің мәліметінше, жергілікті тұрғынның арызы бойынша оқиға орнына жеткен тәртіп сақшыларына ер адам үйден қарумен шығып, көрші аулада орналасқан сарайға тығылған. Қауіптің алдын алу мақсатында аумақ толық қоршалып, тұрғындар қауіпсіз жерге шығарылған.

«Полиция қызметкерлерінің заңды талаптарына бағынбаған азамат оларға бағыттап оқ атқан. Нәтижесінде бір полицей жарақат алған», – делінген ведомство хабарламасында.

Құқық қорғаушылар шабуылды тойтару және өзге адамдардың өміріне төнген қауіптің алдын алу үшін әуеге ескерту оғы атқан. Алайда ер адам қаруын тастамай, қарсылық көрсетуді жалғастырған. Осыдан кейін тәртіп сақшылары заңға сәйкес табельдік қару қолдануға мәжбүр болған.

Күдікті алған жарақатынан оқиға орнында көз жұмды.

Тексеру кезінде тіркелмеген шолақ мылтық, патрондар және гильзалар тәркіленді. Оқиға бойынша қылмыстық іс қозғалып, барлық мән-жай анықталып жатыр.

Тергеу барысы Түркістан облысы полиция департаменті басшылығының қатаң бақылауында.