«Маған ұзақ уақыт қысым жасалды»: «Өрлеу» филиалының директоры мәлімдеме жасады

Жақында әлеуметтік желілерде «Өрлеу» біліктілікті арттыру ұлттық орталығы» АҚ Қызылорда облысы бойынша филиалының директоры болып тағайындалған Жанат Нұрлыбаеваның қызметіне қатысты шынайылыққа жанаспайтын түрлі болжамдар мен пікірлер таратылуда. Осыған орай, филиал басшысы Facebook парақшасы арқылы өз ұстанымын жария етті.

Жанат Нұрлыбаева өзінің 29 жылдық педагогикалық еңбек өтілінің 19 жылын «Өрлеу» жүйесіндегі үздіксіз қызметке арнағанын жеткізді. Ол 2023 жылдан бастап мекеменің Түркістан облысындағы өкілдігін басқарған тәжірибелі маман.

Өз мәлімдемесінде басшы 2025 жылы «Өрлеу» БАҰО» АҚ басқарма төрағасы А. Шілібекованың қызметі кезінде өзіне өз еркімен жұмыстан босау туралы қысым жасалғанын айтты. Заң шеңберінде әрекет етуді құптаған Ж. Нұрлыбаева бұл ұсынысқа келіспеген. Оның сөзінше, осыдан кейін оған қызметтік қысым көрсетіліп, өзі атқарып отырған лауазымға басқа тұлға бейресми түрде таныстырылған. Соңында штаттың қысқаруы сылтауымен қызметінен босатылған.

Бұл мәселе бойынша сотқа жүгінгенін мәлімдеген филиал директоры сот процесінде жұмыс беруші тараптың заң бұзушылықтары анықталғанын, сонымен қатар «Е-Өтініш» жүйесі арқылы алынған жауаптарда кадрлық шешімнің алдын ала дайындалғаны расталғанын атап өтті.

Ж. Нұрлыбаева Қызылорда облыстық филиалының директорлық лауазымына жарияланған конкурсқа Қазақстан Республикасының азаматы ретінде, қолданыстағы заңнама талаптарына сәйкес қатысып, жеңімпаз атанғанын мәлімдеді. Ол бұл қызметке кәсіби тәжірибесі мен білімінің арқасында тағайындалғанын, ешқандай туыстық немесе өзге де артықшылықтар орын алмағанын баса айтты.

Мәлімдеме соңында Жанат Нұрлыбаева қоғамды жалған ақпарат таратпауға шақырып, негізсіз айыптаулардың заң алдында жауапкершілігі бар екенін еске салды. Сондай-ақ, ол алдағы уақытта да кәсібилік пен адалдық қағидаттарына сай қызмет ететінін жеткізді.