«Реал Мадрид» дәрігерлері Мбаппені емдеуде қателік жіберген

 Мадридтік «Реал» футбол клубының медициналық қызметі шабуылшы Килиан Мбаппенің жарақатын анықтау кезінде елеулі қателік жібергені белгілі болды. RMC Sport және COPE басылымдары хабарлауынша, алғашқы диагностика барысында мамандар футболшының зақымдалған сол жақ тізесінің орнына, қателесіп сау оң жақ тізесін тексерген.

Еске сала кетейік, 2025 жылдың желтоқсан айының соңында 27 жастағы Мбаппеге сол жақ тізесінің сіңірлері созылған деген диагноз қойылған болатын. Соның салдарынан ол үш аптаға қатардан шығып, 2026 жылдың қаңтар және ақпан айларындағы бірқатар маңызды ойындарды өткізіп алды.

Журналист Даниэль Риоло бұл жағдайды мадридтік клубтың медициналық персоналындағы ауқымды өзгерістермен байланыстырады. Оның айтуынша, қаңтар айындағы дәрігерлердің жұмыстан босатылуына Мбаппеге қатысты жасалған «сәтсіз әрі өрескел қате диагностика» басты себеп болған. Тек француздық мамандардың араласуы ғана спортшыға ота жасатудан қашып, тезірек қалпына келуге мүмкіндік берген.

Килиан Мбаппе жарнамалық шаралардың бірінде бұл ақпаратты растап, нақты диагноз бен емдеу жоспары Францияда жасалғанын атап өтті. «Маған Парижге келгенде дұрыс диагноз қойылғаны үшін жолым болды десем болады. Оған дейін ауырсынудың себебін түсінбеген едім. Қазір тізем жақсы, 100 пайызға қалпына келдім», — деді шабуылшы.

Орын алған келеңсіздікке қарамастан, француздық сұрмерген биылғы маусымда мадридтік клуб сапында 35 матчқа қатысып, 38 гол соғып, жоғары нәтиже көрсетіп отыр. Дегенмен, әлемдік деңгейдегі клубтың медициналық қызметі тарапынан жіберілген бұл қателік спорттық ортада үлкен талқыға түсті.