Lufthansa әуе компаниясы Қазақстанға рейстерін қайта бастайды

Lufthansa 2026 жылғы 29 наурыздан бастап Германия мен Қазақстан арасындағы тұрақты рейстерін қайта жаңғыртады. Бұл туралы әуе тасымалдаушының баспасөз қызметі хабарлады.

Авиакомпания Франкфурт-на-Майне қаласынан Алматы және Астана бағыттарына ұшуларды орындайды. Аптасына Алматыға – бес рет, Астанаға – төрт рет рейс жоспарланған. Ұшулар шеңберлік бағыт бойынша жүзеге асырылады: Франкфурт – Алматы – Астана – Франкфурт.

Жолаушыларға әр қаладан Франкфуртқа тікелей рейстермен қатар, Еуропа елдері мен Солтүстік Америка бағыттарына ыңғайлы түйісу мүмкіндігі ұсынылады.

Аралық қону кезінде Астанада әрі қарай ұшатын жолаушылар әуе кемесінің бортында қалады. Алматыда транзиттік жолаушылар үшін әуежайдың арнайы аймағында күту қарастырылған.

Рейстер Airbus A340-300 әуе кемесімен орындалады. Ұшақ бортында үш қызмет көрсету класы қарастырылған:

• толық жайылатын төсек-орындықтары бар бизнес-класс;
• премиум-эконом класс;
• құрлықаралық сапарларға арналған эконом-класс.

Барлық класта жолаушыларға тамақ пен сусындар ұсынылады, сондай-ақ жеке мониторлар арқылы ойын-сауық бағдарламаларын (балаларға арналған контентті қоса алғанда) көруге мүмкіндік беріледі. Сонымен қатар FlyNet интернет қызметі қолжетімді.

Айта кетейік, Lufthansa 2025 жылғы 26 қазаннан бастап Қазақстанға рейстерін уақытша тоқтатқан болатын. ҚР Көлік министрлігі бұл шешімді Ресей әуе кеңістігін айналып өту қажеттілігімен, әуе кемелерінің тапшылығымен, жеткізілімдердің кешігуімен және маусымдық жолаушылар ағынының төмендеуімен түсіндірген еді.