LRT пойызы тоқтап қалса не болады: CTS түсініктеме берді

CTS LRT жүйесіндегі төтенше жағдайлар кезінде жолаушылар қауіпсіздігі қалай қамтамасыз етілетінін түсіндірді

Астанадағы LRT желісі іске қосылған алғашқы тәулікте (16-17 мамыр аралығы) жолаушылардың қауіпсіздік ережелерін бұзуына байланысты бірнеше оқиға тіркелді. Бұл жағдайлар пойыз қозғалысының уақытша тоқтауына себеп болған.

CTS компаниясының мәліметінше, оқиғалардың негізгі себебі автоматтандырылған жүйедегі ақаулар емес, жолаушылардың қауіпсіздік талаптарын сақтамауы болған. Компания желі жұмысы барысында автоматикадан ешқандай ақау анықталмағанын хабарлады.

Сондай-ақ әрбір құрамда қозғалыстың қауіпсіздігін қамтамасыз етіп, штаттық режимді қалпына келтіруге жауапты кезекші оператор болған.

CTS өкілдерінің айтуынша, апаттық тоқтау жағдайында да LRT пойызы жолаушыларды жақын маңдағы станцияға дейін жеткізе алады.

«LRT құрамы толық тоқтап қалған жағдайда эстакада желісі толықтай электр қуатынан ажыратылады. Бұл жолаушылардың электр тогынан зардап шегу қаупін болдырмайды. Әрбір пойыз жақын станцияға дейін өздігінен жетуге мүмкіндік беретін аккумуляторлық батареялармен жабдықталған. Осылайша жолаушыларды қауіпсіз эвакуациялау қамтамасыз етіледі», – деп мәлімдеді компания.

Бұдан бөлек, төтенше жағдай кезінде вагондарда авариялық желдету жүйесі автоматты түрде іске қосылады. Негізгі электр қуаты өшкен жағдайда да резервтік аккумуляторлар арқылы таза ауа беру жалғасады.

Еске салсақ, бұған дейін Астана әкімі Жеңіс Қасымбек LRT іске қосылғаннан кейінгі екі апта ішінде жолаушылар саны 1 миллион адамға жеткенін мәлімдеген болатын. Қазіргі уақытта желіні күн сайын шамамен 65–75 мың адам пайдаланады.