Леонардо да Винчидің туындысы Ұлттық музей төрінде: оны көруге келетіндер саны қанша?

Әлемге әйгілі суретші Леонардо да Винчидің туындысы елорда төріне жайғасты. “Әдемі ханшайым” деп аталатын картинаны соңғы он күнде жеті мыңға жуық адам тамашалаған, деп хабарлайды Qrnews тілшісі 24.kz-ке сілтеме жасап. Аталмыш суретті Астанадағы ұлттық музейден көру кез-келген адам үшін қолжетімді. Картинаның түпнұсқасын көруге келген көрермендер қатарында шетелдіктер де аз емес. 

Ұлттық музейде қылқалам шебері Леонардоның картинасы тұр. Кей деректерде бұл картинаның неміс суретшілерінің салғаны туралы айтылған еді. Алайда, зерттеушілер картинадан ұлы суретшінің қолтаңбасын табылғанын жеткізді. Айта кететін жайт, ұлттық музейге қондырылған бұл картина Леонардоның соңғы туындыларының бірі екені анықталды.

ҚР Ұлттық музейінің халықаралық қатынастар бөлімі жетекшісі Құмар Жүнісовтің айтуынша, картина 1998 жылы Нью-Йорктағы аукционда сатылған. Туынды неміс суретшілерінікі дегенге сенбеген сатып алушы картинаны Леонардоның туындыларын зерттейтіндерге өткізеді. Нәтижесінде картинаның түпнұсқа екені анықталып, авторлық құқық Леонардоға тиесілі болады. 

Ұлттық музейдегі көрме 7 маусым күні ашылды. Алғашқы қонақ ел президенті Қасым-Жомарт Тоқаев атанды. Содан бері “Әдемі ханшайымды” көруге күніне 700-ге жуық адам келеді. Италиялық суретшінің картинасы ұлттық музей қабырғасында 4 тамызға дейін ілулі тұрады.

Рахат Жора