Қызылша қаупі: Ауырғандардың басым бөлігі - 5 жасқа дейінгі балалар

Биыл жыл басынан бері Қазақстанда қызылшаның 1 951 жағдайы тіркелді, деп хабарлайды Үкіметтің баспасөз қызметі. Денсаулық сақтау министрлігінің мәліметінше, 2025 жылдың қорытындысы бойынша аурушаңдық деңгейі 2024 жылмен салыстырғанда 85%-ға төмендеген. Алайда, биылғы жылдың алғашқы айларында инфекция қайта белең алып отыр.

Ең көп ауру тіркелген өңірлер:

• Астана және Алматы қалалары;
• Жамбыл облысы;
• Атырау облысы.

Негізгі себеп - вакцинациядан бас тарту:

Ауырғандардың басым бөлігі - бес жасқа дейінгі балалар. Мамандардың айтуынша, науқастардың басым көпшілігі екпе алмаған. Бұған ата-аналардың вакцинациядан саналы түрде бас тартуы басты себеп болып отыр.

ҚР Премьер-министрінің орынбасары - Мәдениет және ақпарат министрі Аида Балаеваның төрағалығымен өткен кеңесте профилактикалық екпелермен қамту мәселесі талқыланды.

«Бірқатар өңірлерде нысаналы көрсеткіштерге қол жеткізілмей отыр. Әсіресе, Маңғыстау облысында вакцинацияның барлық негізгі түрлері бойынша қамту деңгейі төмен», - деп атап өтілді жиында.

Жиын қорытындысы бойынша Аида Балаева бірнеше маңызды тапсырма берді:

• Күнделікті талдау: Әкімдіктер жанындағы өңірлік штабтар эпидемиологиялық жағдайды күн сайын саралап отыруы тиіс.
• Алғашқы буын жұмысы: Емханалар деңгейіндегі мекенжайлық жұмысты күшейту.
• Ақпараттық жұмыс: Халыққа иммундаудың маңыздылығын түсіндіру шараларын жандандыру.