Қызылордалық зейнеткер өз үйін сатып жібергенін 3,5 жылдан кейін білген

Қызылордада сот 70 жастағы әйелдің үйін сату туралы келісімді жарамсыз деп таныды. Зейнеткер үш жарым жылдан астам уақыт бойы баспанасының басқа адамның атына өтіп кеткенін білмей, сол үйде тұра берген, деп хабарлады Жоғарғы сот.

Іс материалдарына сәйкес, 2022 жылы әйелдің үйі 19 млн теңгеге сатылды деген келісіммен басқа адамның атына рәсімделген. Алайда зейнеткер баспанасын сатуға ниеті болмағанын айтқан. Оның ұлы қарызға ақша алған, ал үй сол қарыздың қайтарылуына кепіл ретінде ұсынылған.

Жасы ұлғайған, көру және есту қабілеті нашарлаған әйел нотариуста үйін кепілге қоюға арналған құжаттарға қол қойып жатырмын деп ойлаған.

Осыдан кейін де ол отбасымен бірге үйінде тұрып, коммуналдық төлемдерді өзі төлеген. Үйдің жаңа иесі ретінде тіркелген адам үш жарым жылдан астам уақыт бойы баспананы пайдаланбаған және оған келмеген. Кейін ол сотқа жүгініп, зейнеткер мен оның отбасы мүшелерін үйден шығаруды талап еткен.

Сотта 19 млн теңгені әйелдің ұлына үйді өз атына рәсімдеген адамның әкесі бергені анықталды. Үйді сату туралы келісім осы қарыздың қайтарылуын қамтамасыз ету үшін жасалған. 2023–2024 жылдары қарыз берген тарапқа 4 млн теңге қайтарылған.

Сот әйелдің үйін сатуға шын мәнінде ниеті болмаған деген қорытындыға келіп, сатып алу-сату келісімін жарамсыз деп таныды. Бұл шешімді апелляциялық және кассациялық соттар да өзгеріссіз қалдырды.

Сондай-ақ сот Әділет департаментінің басшысына жеке ұйғарым шығарды. Мемлекеттік органға келісімді рәсімдеген жекеше нотариустың әрекетіне құқықтық баға беріп, анықталған заң бұзушылықтарды жою тапсырылды.