Қызылорда облысында алимент төлемеген борышкерлер 250 млн теңге қаржыны құмар ойынға салған

Облыс прокуратурасы алимент төлеудің орнына ақшасын құмар ойынға жұмсаған 154 борышкерді анықтады. Олардың бірі букмекерлік кеңседе өз шотын 156 млн теңгеге дейін толтырған. Оның алимент бойынша 1 млн теңге қарызы болған.

Соңғы алты айда 155 жалғыз басты ананың пайдасына 91 млн теңге алимент  берешегі өндірілді. Алимент төлеуден жалтарып жүрген 147 қаскөй борышкер ӘҚБтК-нің 669-бабымен әкімшілік қамаққа алу және айыппұл салу түріндегі жазаға тартылды. Өз міндеттерін тиісінше орындамағаны үшін 39 жеке сот орындаушысы тәртіптік жауапкершілікке тартылды. 18 борышкерге қатысты сотқа дейінгі тергеп-тексеру жұмыстары басталып, оның 9-ына бас бостандығын шектеу жазасы тағайындалды.

Қызылорда облысында алимент берешегі 380 млн теңгеге дейін төмендеп, еліміздегі  берешегі ең аз аймақтың қатарына кірді.