Қызылорда-Арал жолы ақылы болмақ

Биылғы 26 қаңтардан бастап «Қызылорда-Арал» жолының 454 шақырымдық учаскесі жүк көліктері мен автобустар үшін ақылы болады. Бұл туралы ҚР Көлік министрлігінің 2025 жылғы 9 қаңтардағы №6 бұйрығында айтылған.

Ақылы жүйе «ашық» форматта жұмыс істейді, яғни төлем бекеттері мен шлагбаумдар болмайды. Төлемдер тек қолма-қол ақшасыз жүргізіліп, пайдаланушылар үшін төлеудің 10-ға жуық әдісі ұсынылады. Жол ақысының мөлшері көлік түріне және алдын ала төлем жасалған-жасалмағанына байланысты 2840 теңгеден 16 830 теңгеге дейін өзгереді. Жеңіл көліктер үшін жол тегін.

Бір бағыттағы (454 шақырым) төлем мөлшері:

- 16 орынға дейінгі автобустар және жүк көтергіштігі 2,5 т. дейін жүк автомобильдері үшін алдын-ала төлем – 2840 теңге, кейінгі төлем – 3330 теңге;

- 32 орынға дейінгі автобустар және жүк көтергіштігі 5,5 т. дейін жүк автомобильдері үшін алдын-ала төлем – 5750 теңге, кейінгі төлем – 6740 теңге;

- 32 орыннан асатын автобустар және жүк көтергіштігі 10 т. дейін автопоездар үшін алдын-ала төлем – 8570 теңге, кейінгі төлем – 10 100 теңге;

- жүк көтергіштігі 10 т. жоғары және 15 т. дейінгі жүк автомобильдері үшін алдын-ала төлем – 11 470 теңге, кейінгі төлем – 13 470 теңге;

- жүк көтергіштігі 15 т. жоғары жүк автомобильдері, оның ішінде тіркелгіш және ершікті тартқыштар үшін алдын-ала төлем – 14 290 теңге, кейінгі төлем – 16 830 теңге.

Жиналған қаражат жол инфрақұрылымын күтіп-ұстауға және оның қауіпсіздігін қамтамасыз етуге жұмсалады.