Қыз алып қашқандар жеті жылға дейін сотталуы мүмкін

Бұл туралы Мәжіліс депутаты Мұрат Әбенов мәлімдеді.

Депутаттың айтуынша, бұған дейін ол қыз алып қашуға байланысты бөлек бап енгізуді ұсынған. Алайда жұмыс тобы бұл мәселені кеңейтіп, “Некеге тұруға мәжбүрлеу” деген жаңа бап енгізуді ұсынған.

– Біз оны дұрыс атадық. Бұл тек алып қашу емес, барлық мәжбүрлеу жағдайларын қамтиды. Мұнда үш деңгей қарастырылған: біріншісі – айыппұл, екіншісі – егер оқиғада кәмелетке толмағандар болса, күш қолданылса немесе бұл бірнеше адамның әрекеті болса – 5 жылдан 7 жылға дейін бас бостандығынан айыру жазасы көзделеді, – деді депутат.

Әбеновтің айтуынша, соңғы үш жылда құқық қорғау органдарына қыз алып қашуға байланысты 214 арыз түссе де, соның тек 10-ы ғана сотқа жеткен. Қалған істер қылмыстық құрам болмағандықтан жабылған.