Қыз алып қашқандар бес жылға дейін сотталуы мүмкін

Мәжіліс депутаттары қалыңдық ұрлауға қылмыстық жаза енгізу туралы заң жобасын талқылап жатыр. Бұл жөнінде мәжіліс депутаты Мурат Әбенов мәлімдеді.

"Мен Қылмыстық, Қылмыстық-атқару және Қылмыстық-процестік кодекстерді оңтайландыру аясында өз ұсынысымды енгіздім. Қазір ол жұмыс тобының қарауында", – деді Әбенов.

Оның айтуынша, жаңа бапқа сәйкес, қалыңдық ұрлау жағдайына қарай әртүрлі жаза қарастырылған. Егер қылмыс топ болып жасалса, немесе кәмелетке толмаған қыз ұрланса, жәбірленушіге зиян келтірілсе, кінәлілер 3-5 жылға дейін бас бостандығынан айырылуы мүмкін.

"Егер қызды үйде күштеп ұстаса, психологиялық және физикалық қысым көрсетсе, заң жәбірленушінің жағында болуы керек", – деп түйіндеді депутат.