«Қытайдан қорықсақ, айға немесе Марсқа көшіп кетейік» – Берік Уәли

Абай облысының әкімі Берік Уәли жергілікті тұрғындармен кездесу кезінде Қытайға қатысты қоғамда тараған алаңдаушылыққа пікір білдірді. Оның айтуынша, Қытайдан қорқудың немесе оған қарсы көзқарас қалыптастырудың қажеті жоқ.

Кездесуде Аягөз қаласының тұрғыны қонақүйлер мен қоғамдық орындарда Қытай азаматтарының көбейгеніне алаңдаушылық білдірген. Бұған жауап ретінде Берік Уәли көрші елмен ынтымақтастықтан қашудың қисынсыз екенін атап өтті.

«Қытай дегеннен қашпау керек. Әлем мемлекеттерінің бәрі Қытайдың инвестициясына зәру. Қасында тұрған Қытайдан тасымағанда, Италиядан тасимыз ба ақшаны?» – деді облыс әкімі.

Ол халықты Қытайға қарсы бағыттауға болмайтынын айтып, керісінше, елге келетін қытайлық азаматтарға түсіністікпен қарауды сұрады.

«Халықты адастырып, Қытайға қарсы қоюға болмайды. Қайта сол қытайларға көмектесіңіздер», – деді Берік Уәли.

Сондай-ақ әкім Қазақстан мен Қытай арасындағы визасыз режимнің енгізілгені үшін президент Қасым-Жомарт Тоқаев пен ҚХР төрағасы Си Цзиньпинге алғыс білдірді.

Айтылған сөзінің соңында Берік Уәли: «Егер Қытайдан қорықсақ, айға немесе Марсқа көшіп кетейік», – деп әзіл аралас мысал келтірді.