Zeekr көліктері Қытайға кері қайтарылды. Қазақстанға қатысы бар ма?

Жақында Қытайдың реттеуші органы жоғары вольтты батареялардағы ықтимал қауіптерге байланысты Zeekr 001 WE үлгісіндегі 38 277 автокөлікті нарықтан кері қайтаратынын жариялады. Бұл жаңалық қазақстандық автосүйер қауым арасында біраз алаңдаушылық туғызғаны анық.

Алайда, отандық ресми дистрибьютор - Orbis Auto құрылымына кіретін Zeekr компаниясы бұл жағдайға қатысты ресми мәлімдеме жасады.

Дистрибьютордың айтуынша, Қытайдағы кері қайтару науқаны Қазақстан нарығында ресми сатылатын көліктерге ешқандай қатысы жоқ. Бұның бірнеше негізгі себебі бар:

Біріншіден, біздің елге жеткізілетін көліктердің техникалық спецификациясы өзгеше. Олар аймақтың климаттық жағдайларына арнайы бейімделген. Екіншіден, Қазақстандағы ресми Zeekr модельдері CATL компаниясының аккумуляторлық батареяларымен жабдықталған, ал ақау шыққан қытайлық партияда бұл батареялар қолданылмаған.

Сонымен қатар, ресми жеткізілетін әрбір автокөлік еуропалық сертификаттау талаптары мен еліміздің техникалық регламенттеріне толық сәйкес келеді. Сондықтан, ресми дистрибьютор арқылы көлік алған иелерге алаңдауға ешқандай негіз жоқ. Өндірушімен тікелей байланыс орнатылған және қауіпсіздік стандарттары қатаң бақылауда.