Қытайдағы қысқы Азия ойындары: Қазақстан қандай спорт түрлерінен қатысады?

2025 жылдың 7-14 ақпаны аралығында Қытайдың Харбин және Ябули қалаларында 9-қысқы Азия ойындары өтеді. Жарыста Азияның 32 елінен келген 1 000-нан астам спортшы 64 медаль жиынтығы үшін бақ сынасады.

Ел құрамасы бұл додаға 138 спортшыны (72 ер адам, 66 әйел) қосып, 6 спорт түрінен 10 дисциплина бойынша өнер көрсетеді. Команда 51 медаль жиынтығына таласпақ.

2025 жылы ұлттық құрама сапында биатлоншы Александр Мухин, шорт-трекшілер Абзал Әжғалиев пен Денис Никиша, фристайл-акробаттар Шерзод Хаширбаев пен Аяна Жолдас сынды үздік спортшылар бар. Шайбалы хоккейден ерлер құрамасы да үлкен үміт артып отырған қатысушылар қатарында.

Қазақстандық спортшылар 137 оқу-жаттығу жиынын өткізіп, 86 халықаралық турнирге қатысты. Харбинге шығарып салу рәсімі 30 қаңтар күні Астанадағы «Қазақстан» жеңіл атлетика спорт кешенінде өтеді.

Азия ойындарында Қазақстанның ту ұстаушылары ретінде хоккейші Әділ Бекетаев пен шорт-трекші Ольга Тихонова таңдалды.