Қытай ғалымдары өмірді 120 жасқа дейін ұзартудың жолын тапты

Қытайдың Шэньчжэнь қаласындағы Lonvi Biosciences стартап-компаниясы адамның өмірін 120 жасқа дейін ұзартуға мүмкіндік беретін препарат әзірлеп жатыр. Бұл жөнінде The New York Times хабарлады.

Компанияның мәліметінше, жаңа дәрі жасушалардың қартаю процесін баяулатып, ағзадағы ескі әрі зиянды жасушаларды жоюға бағытталған. Препараттың негізгі құрамы – жүзім дәнінің экстрактісінен алынған табиғи қосылыстар.

Lonvi Biosciences мамандары жүзім дәніндегі ерекше молекуланы бөліп алып, оның қартаюға қарсы әсерін дәлелдегенін айтады. Бұл молекула ағзадағы зақымданған, бірақ жойылмайтын жасушаларды бейтараптандыру арқылы тіндердің саулығын сақтайды.

Басылымның жазуынша, жүзім дәні ежелден-ақ Батыс пен Қытай медицинасында пайдалы өнім ретінде белгілі. Компания осы табиғи компонент негізінде жоғары концентрациялы белсенді капсулалар өндіру технологиясын жасаған.

Lonvi Biosciences өкілдері бұл таблеткалар дұрыс тамақтану, белсенді өмір салты және сапалы медициналық күтіммен қатар қолданылған жағдайда, адамның өмірін 100–120 жасқа дейін ұзартуға көмектесуі мүмкін деп есептейді.