Қытай–Еуропа рейстері Павлодар арқылы ұшуы мүмкін - әкім жаңа деректермен бөлісті

Бүгін Павлодар облысының әкімі Асаин Байханов Орталық коммуникациялар қызметінде өткен брифингте өңірдегі әуежай ірі ұшақтарды қабылдай алатындай кеңейтіліп жатқанын айтты. 

“Airbus 320, 321 және Boeing 737, 747 сияқты ұшақтар 60 метрлік ұшу жолағына қона алады. Ұзындығы 2,5 км ұшу жолағы үлкен әуе кемелеріне қолайлы жағдай жасайды”-деді өңір басшысы. 

Әкімнің айтуынша, 

Павлодар облысында авиациялық керосин бағасы басқа өңірлерге қарағанда 5-7% арзан, себебі мұнда керосиннің 32%-ы өндіріліп, жеткізіледі. Сондықтан Қытайдан Еуропаға ұшып бара жатқан ұшақтар бізге тоқтап, жанармайын толықтыра алады. 100-200 тонна жанармай құйған жағдайда айтарлықтай қаражат үнемдей алатынын атап өтті.

Әкімдік басқа елдермен келіссөздер жүргізіп жатқанын, алайда әуежай әлі ашылмағандықтан нақты келісімшарттар жоқ екенін жеткізді. Алғашқы бағыттар ретінде Павлодардан Шымкент, Ақтау, Алматы, Астана және Ресейдегі Новосибирск қалалары қарастырылып отыр.