Қытай Астанада қоқысты электр қуатына айналдыратын зауыт салып бермек

«Астана Энергиясы» экопаркі – жай ғана қоқыс өңдейтін зауыт емес. Ол қалдықтарды кәдеге жаратып, одан электр энергиясын өндіретін заманауи энергетикалық кешен болмақ. Waste-to-energy технологиясы Еуропа мен Азия елдерінде кеңінен қолданылып келеді, алайда Қазақстан үшін мұндай ауқымдағы жоба алғаш рет жүзеге асырылмақ.

Жоспарға сәйкес, кешен тәулігіне кемінде 1500 тонна қалдық өңдеп, 50 МВт электр энергиясын өндіреді. Бұл шамамен 50 мың үйді жарықпен қамтамасыз етуге жеткілікті.

Жобаның жалпы инвестиция көлемі – 180 миллион доллар. Экопарк 2029 жылдың маусым айында пайдалануға беріледі деп күтілуде.

Жобаны іске асыру үшін Астанада қытай тарапының қатысуымен «East Hope» атты бірлескен кәсіпорын құрылды.

Қазіргі таңда Қазақстанда жыл сайын 5–6 миллион тонна тұрмыстық қатты қалдық түзіледі. Алайда оның өте аз бөлігі ғана қайта өңделеді. Қалдықтардың басым бөлігі полигондарға жөнелтіледі, ал олардың көбі шамадан тыс жүктемемен жұмыс істеп тұр немесе заңсыз қоқыс орындарына айналған.

Қоқысты энергияға айналдыру технологиясы әлемде кең таралған, әсіресе жер ресурсы шектеулі әрі экологиялық талаптары жоғары елдерде тиімді қолданылады.

Мәселен, Швеция, Дания, Германия және Нидерланды бұл салада көш бастап тұр. Швецияда тұрмыстық қалдықтардың шамамен 50%-ы осындай тәсілмен өңделеді. Тіпті елдегі зауыттардың қуатын толықтыру үшін сырттан қоқыс импортталады.

Ал соңғы 20 жылда Қытай әлемдегі ең ірі қоқыс өңдеу инфрақұрылымын қалыптастырды. Елде тәулігіне 500 мың тоннадан астам қалдық өңдейтін 500-ден аса зауыт жұмыс істейді. Қытайлық компаниялар бүгінде мұндай нысандарды салуда ауқымы мен технологиялық тиімділігі жағынан әлемдік көшбасшылардың қатарында.