Қырымда Ан-26 әскери ұшағы апатқа ұшырап, 29 адам қаза болды

Қырым аумағында Ан-26 әскери-көлік ұшағы апатқа ұшырап, борттағы 29 адамның барлығы қаза болды. Бұл туралы Ресей Қорғаныс министрлігі хабарлады.

Министрліктің мәліметінше, іздеу-құтқару тобы ұшақ құлаған орынды тапқан. Алдын ала есеп бойынша, апат салдарынан экипаждың 6 мүшесі мен борттағы 23 жолаушы көз жұмған.

Ведомствоның алдын ала нұсқасы бойынша, ұшақ техникалық ақау салдарынан апатқа ұшыраған. Министрлік өкілдері ұшаққа сырттан ешқандай зақым келмегенін мәлімдеді.

Ресей Қорғаныс министрлігі 31 наурыз күні жергілікті уақытпен сағат 18:00 шамасында Ан-26 әскери ұшағымен байланыс үзілгенін хабарлаған. Ұшақ аннексияланған Қырым аумағында жоспарлы ұшу орындап жүрген.