Қыркүйектен бастап жаңа ереже күшіне енеді: Бейнебақылау камераларына қойылатын талаптар қатаңдатылды

Қазақстанда бейнебақылау камераларының техникалық сипаттамасы мен орнатылуына қойылатын алғашқы ұлттық стандарт бекітілді. Бұл туралы Техникалық реттеу және метрология комитеті хабарлады.

Жаңа стандарт 1 қыркүйектен бастап күшіне енеді. Ол ғимараттар мен құрылыстарды жобалау, салу және қайта жаңғырту кезінде орнатылатын әрі кейін цифрлық жүйелерге қосылатын бейнебақылау камералары мен жүйелеріне қолданылады.

Стандартқа сәйкес, негізгі бейнеағынның ажыратымдылығы кемінде 1920×1080 пиксель, ал түсіру жиілігі секундына кемінде 25 кадр болуы тиіс. Сондай-ақ камералар кемінде екі бейнеағынды, H.264 немесе H.265 қысу форматтарын қолдап, үздіксіз жазу, деректерді беру және өңдеу мүмкіндігіне ие болуы қажет.

Құжатта бейнеаналитикаға да талап қойылған. Камералар адамның бет-жүзін және көлік нөмірін тануға, оқиғаларды тіркеуге және пайдаланушыларға хабарлама жіберуге мүмкіндік беруі керек. Бейнежазбалар кемінде 30 тәулік сақталуға тиіс.

Бұдан бөлек, сыртқы камералар ауа райының әсерінен қорғайтын IP66 деңгейіндегі қорғанысқа ие болуы қажет. Стандарт камераларды орнату биіктігіне, көру бұрышына және басқарылатын камералардың техникалық мүмкіндіктеріне қатысты талаптарды да белгілейді.

Ұлттық стандартты әзірлеуге Ұлттық қауіпсіздік комитеті бастамашы болған.