Қыркүйекте қазақстандықтар қандай салықтар мен төлемдерді төлеуі керек

Алматы қаласы бойынша Мемлекеттік кірістер департаменті қыркүйекте салық төлеушілер қандай есептілікті тапсырып, қандай төлемдерді уақытында төлеуі керектігін түсіндірді. Маңызды мерзімдердің бірі – 15 қыркүйекке дейін 250.00 және 270.00 нысандары бойынша декларация тапсыру.

Қандай есептілікті тапсыру керек?

15 қыркүйекке дейін:

• 400.00 нысаны – шілде айының акцизі бойынша декларация;
• 250.00 нысаны – 2025 жылғы 31 желтоқсандағы жағдай бойынша активтер мен міндеттемелер туралы декларация;
• 270.00 нысаны – 2025 жылға арналған кірістер мен мүлік туралы декларация.

21 қыркүйекке дейін:

• 328.00 нысаны – тамызда тауар әкелу және жанама салықтарды төлеу туралы өтініш;
• 851.00 нысаны – жер телімдерін пайдаланғаны үшін ағымдағы төлемдер есебі;
• 870.00 нысаны – қоршаған ортаға кері әсер еткені үшін төлем бойынша декларация.

Салықтарды қай күнге дейін төлеу керек?

7 қыркүйекке дейін жеке практикамен айналысатын адамдар тамыз айындағы кірісі бойынша жеке табыс салығын төлеуі қажет.

15 қыркүйекке дейін интернет-платформа операторы өзін-өзі жұмыспен қамтығандарға арналған арнаулы салық тәртібі бойынша тамыз айының жеке табыс салығын аударады.

21 қыркүйекке дейін Еуразиялық экономикалық одақ аясындағы тамыз айының қосылған құн салығы мен акцизі, сондай-ақ қоршаған ортаға кері әсер еткені үшін төлем өтелуі керек.

24 қыркүйекке дейін бейрезиденттердің жекелеген санаттарына тамызда төленген кірістер бойынша жеке табыс салығы төленеді.

25 қыркүйекке дейін бірқатар негізгі салықтар мен міндетті төлемдерді өтеу қажет. Олардың қатарында корпоративтік және жеке табыс салығы, әлеуметтік салық, жер телімдерін пайдалану төлемі, сыртқы жарнама төлемі, бірыңғай төлем, міндетті зейнетақы жарналары мен міндетті әлеуметтік медициналық сақтандыру төлемдері бар.

Мемлекеттік кірістер департаменті салық төлеушілерге есептілік пен төлемдерді соңғы күнге қалдырмауға кеңес берді. Бұл техникалық кідірістер мен өсімпұл есептелуінің алдын алуға мүмкіндік береді.