Қырғызстандық мұғалім Түркияға барып, жоғалып кетті

Қырғызстанның Ыстықкөл облысы Қарақол қаласындағы Х.Қарасаев атындағы лицейдің математика пәнінің мұғалімі, екі баланың әкесі Азамат Нурматов Түркияға оқушыларды апарып, із-түзсіз жоғалып кеткен. Бұл туралы Turmush басылымына оқушылардың ата-аналары хабарлаған.

Ата-аналардың айтуынша, А.Нурматов 7 оқушыны Анталия қаласында өтіп жатқан Zeen халықаралық математика олимпиадасының екінші кезеңіне қатысу үшін ертіп барған. Олимпиада 20 сәуірде басталып, 25 сәуірге дейін жалғасады.

19 сәуір күні мұғалімді Стамбұл әуежайында Түркия билігі құжат мәселесіне байланысты ұстап қалған. Ал оқушыларды ары қарай өткізіп жіберген. Мұғалімді нақты кім, не себепті бірнеше күн бойы ұстағаны әзірге белгісіз. Содан бері Азамат Нурматовтан ешқандай хабар жоқ.

Ата-аналар алаңдаулы.

"Біздің балалар олимпиадаға қатысып жатыр. Бірақ олар қараусыз қалды. Біз оларды мұғалімнің жауапкершілігіне тапсырдық. Олимпиада біткен соң, олар елге қайтуы керек. Балалар мен мұғалімді аман-есен елге қайтаруға көмектесуді сұраймыз", – деді олар.

Бұл мәселеге қатысты Қырғызстанның Сыртқы істер министрлігі де түсініктеме берді. Мекеме мәліметінше, жағдай министрлік пен Түркиядағы Қырғызстан өкілдіктерінің бақылауында. Тиісті консулдық Стамбұлда Түркияның құзырлы органдарымен бірлесіп, жағдайдың мән-жайын анықтап жатыр.

Министрлік А.Нурматовтың туыстарымен тұрақты байланыста екенін және оған көмек көрсету шаралары қолға алынғанын хабарлады.