Қырғызстанда Қамшыбек Ташиевтің інісін қамауға алды

Қырғызстанда жемқорлық ісі бойынша бұрынғы депутат Шайырбек Ташиев ұсталды. Ол – ақпанда қызметінен кеткен Ұлттық қауіпсіздік мемлекеттік комитетінің бұрынғы төрағасы Камшыбек Ташиевтің інісі.

Қырғызстан Ішкі істер министрлігінің мәліметінше, ұсталу «Қырғызмұнайгаз» мемлекеттік кәсіпорнындағы қаржы жымқыру фактісі бойынша қозғалған қылмыстық іс аясында жүргізілген. Тергеуге Мемлекеттік салық қызметінің материалдары мен аудиторлық тексеру нәтижелері негіз болған.

Ведомство тергеу әрекеттері жалғасып жатқанын, әзірге басқа мәліметтер жарияланбайтынын хабарлады.

Бұған дейін осы іс бойынша бірнеше адам, оның ішінде «Қырғызмұнайгазбен» байланысты компанияны басқарған Ташиевтердің туысы Байгазы Матисаков та ұсталған болатын.

Шайырбек Ташиев Жогорку Кенештің VIII шақырылым депутаты болған. Алайда «Қырғызмұнайгаз» ісі қозғалып, оның ағасы Камшыбек Ташиев қызметінен кеткеннен кейін ол депутаттық мандатын тапсырған. Сол кезеңде Ташиевке жақын саналған бірнеше депутат та мандаттарын өткізген.

Соңғы апталарда «Қырғызмұнайгаз» кәсіпорнына қатысты жемқорлық схемалары мен қаржылық заңбұзушылықтар туралы ақпараттар жиілеген. Тергеу осы істерге жоғары лауазымды тұлғалар мен олардың жақындарының қатысы болуы мүмкін деген күдік аясында жүргізіліп жатыр.