Қырғызстан–Қазақстан шекарасында 24 мемлекеттік қызметкер ірі коррупциялық схема бойынша ұсталды

Қырғызстанда Мемлекеттік ұлттық қауіпсіздік комитетінің (МҰҚК) төрағасы Камчыбек Ташиевтің қатысуымен өткен кеңесте Қазақстанмен шекарадағы ірі жемқорлық схемасына қатысы бар мемлекеттік органдардың бірқатар қызметкері жаппай ұсталды. Бұл туралы Kazinform агенттігінің тілшісі хабарлайды.

МҰҚК мәліметінше, Чүй облысындағы «Чалдовар-Автодорожный» бақылау-өткізу пункті аумағында салық қызметі, шекара қызметі, Ветеринарлық және фитосанитарлық қауіпсіздік жөніндегі мемлекеттік инспекция мен Көлік және коммуникациялар министрлігіне қарасты өлшеу-бақылау инспекциясының қызметкерлері заңсыз импортпен айналысқан «толкачтармен» сыбайласқан. Олар ЕАЭО елдерінен тауарды жалған құжаттар арқылы өткізіп, көлемі мен құнына қатысты деректерді әдейі бұрмалап отырған.

Тергеу деректеріне сәйкес, Қырғызстан азаматтары Ж.Н.Т., Ш.У.К. (Чалдовар ауылдық кеңесінің депутаты), Т.К.Э. және Өзбекстан азаматы Т.Э.Н. «ТД Жорго» мен «Радиант» ЖШС-ін тіркеп, аталған тауарларды жалған құжатпен заңсыз тасымалдаған. Олар жүйелі түрде мемлекеттік орган қызметкерлеріне пара беріп отырған. Ақша «МБанк» интернет әмияндары арқылы да, қолма-қол да жеткізілген.

18 қыркүйекте екі қатысушы қолға түсті. Олардан алынған дәлелдерге сәйкес, пара 7 салық қызметкеріне, 6 шекара қызметкеріне, 7 фитосанитарлық инспекторға және 4 өлшеу-бақылау инспекциясы қызметкеріне берілген.

Арнайы қызметтің ақпаратына сүйенсек, жүк көліктерінің иелерінен бір фура үшін 1,5–2 мың доллар көлемінде ақы жиналған. Ал мемлекеттік орган өкілдері өзара 5–7 мың сомнан бөлісіп отырған. «Чалдовар-Автодорожный» бекеті арқылы күн сайын 80 мың сом заңсыз ақша түскені анықталды.

Сонымен қатар, Қазақстанмен шекарадағы «Ақ-Жол Автодорожный» және «Ақ-Тилек Автодорожный» бекеттерінде де осындай жемқорлық фактілері бар екендігі хабарланды.

МҰҚК басшысы барлық кінәлілерді қызметтен босатуды, мүлкіне тыйым салуды, жедел-тергеу шараларын жүргізіп, оларды қамауға алып, жауапты мемлекеттік орган басшыларын да заң алдында жауапқа тартуды тапсырды.