Қырғызстан Иранға 129 тонна гуманитарлық көмек жіберді

Қырғыз Республикасының Төтенше жағдайлар министрлігі Иран Ислам Республикасына гуманитарлық жүк жөнелтілгенін ресми түрде хабарлады. Көмек құрамында 66 тонна азық-түлік және 63 тонна дәрі-дәрмек бар.

Жеті жүк көлігінен тұратын керуен ұн, ет консервілері, өсімдік майы мен қажетті медициналық препараттарды жеткізеді. Гуманитарлық жүкті тапсыру рәсімі Қырғызстанның Ирандағы Төтенше және өкілетті елшісі Ақылбек Қылычевтің қатысуымен өтеді.

Бұған дейін ресми Бішкек Таяу Шығыстағы жағдайдың ушығуына байланысты терең алаңдаушылық білдіріп, тараптарды дереу оқ атуды тоқтатуға шақырған болатын. Қырғызстан билігі қақтығысты халықаралық құқық нормалары мен БҰҰ Жарғысына сәйкес бейбіт жолмен шешуді жақтайды.

Ашық дереккөздердің мәліметінше, ағымдағы жылдың 28 ақпанында АҚШ пен Израиль Иранға қарсы бірлескен әскери операция бастаған. Тегеран бұған жауап ретінде Израиль мен аймақтағы басқа да нысандарға соққы беріп жатқанын мәлімдеді.

Аймақтағы шиеленіс Израильдің Иранның ядролық бағдарламасын тежеу туралы мәлімдемелері мен АҚШ-тың 2018 жылы ядролық келісімнен шыққаннан кейінгі санкциялық қысымы аясында күшейіп отыр. Қазіргі уақытта әскери іс-қимылдар Ливан, Сирия, Ирак және Йемендегі проирандық топтардың қатысуымен кең ауқымды сипат алуда.