"Қып-қызыл өтірік": Бала құқықтары жөніндегі уәкіл жаңа петицияға қатысты пікір білдірді

Бала құқықтары жөніндегі уәкіл Динара Зәкиева тұрмыстық зорлық-зомбылық туралы заңға қарсы шыққан петицияға қатысты өз пікірін білдірді. Петиция авторы заңның тәрбиелік процеске кедергі келтіріп, балаларды тартып алудың қарапайым механизмін енгізіп, азаматтардың жеке істеріне араласу құқығына ие құрылымды құрады деп мәлімдеген.

Динара Зәкиева бұл мәлімдемені "қып-қызыл өтірік" деп атады. Оның айтуынша, заңда балаларды тартып алу туралы ешқандай норма жоқ. Керісінше, бұл заң арқылы Президент Қасым-Жомарт Тоқаев қоғамда зорлық-зомбылыққа жол бермеу мәдениетін дамыту, адамды, соның ішінде баланы ұруға болмайтын қоғам құру және заң мен тәртіпті басымдыққа қою міндетін қойған.

"Бұл заңға қарсы болғандардың барлығына, алдымен оны оқып шығуды ұсынамын. Балаларға қатысты қылмыстық істер бойынша жұмысымызға келіп көмектесіңіздер, күнделікті есептерді бір рет көріп, балалармен сөйлесіп, олардың қандай қиындықтардан өткенін тыңдаңыздар. Сонда ғана жазалауды қатаңдатудың қаншалықты маңызды болғанын бағалай аласыздар", – деді Зәкиева.

Динара Зәкиева сондай-ақ дағдарыс орталығында немесе отбасы қолдау орталығында ерікті болып жұмыс істеуге, сөйтіп зорлық-зомбылық құрбандарының не өткергенін түсінуге тырысуға шақырды.

"Жаңа заң бойынша бұл міндеттерді мобильді топтар мен отбасы қолдау орталықтары атқаратын болады", – деп түсіндірді ол.

Өткен жылдың маусым айына дейін мемлекеттік органдардың өкілдерімен бірге елдің 220 елді мекенін аралап, нақты мәселелер мен жағдайды зерттегенін айтқан Зәкиева, заңның қажет еместігін айту алдында осындай жолдан өтуді ұсынды.

"Біз бәріміз елдің амандығын қалаймыз, ол тек қауіпсіз қоғамда ғана қалыптасады. Елдің амандығы отбасылар мен әрбір азаматтың, соның ішінде кішкентай азаматтың да амандығынан құралады", – деп түйіндеді Зәкиева.