Құрылтайдың 145 депутаты ресми тіркелді

Орталық сайлау комиссиясы Қазақстан Республикасы Құрылтайының бірінші шақырылымына сайланған 145 депутатты тіркеді. Осы сәттен бастап олардың депутаттық өкілеттігі ресми түрде басталды.

Құрылтайға бес саяси партияның өкілдері кірді. «Әділет» партиясынан – 110, «Ауылдан» – 10, Respublica-дан – 9, Жалпыұлттық социал-демократиялық партиядан – 8, «Ақ жол» демократиялық партиясынан 8 депутат тіркелді.

ОСК төрағасы Нұрлан Әбдіров «Қазақстан Республикасының Құрылтайы және оның депутаттарының мәртебесі туралы» Конституциялық заңға сәйкес депутаттың өкілеттігі Орталық сайлау комиссиясы тіркеген сәттен басталатынын айтты.

«Сіздердің өкілеттіктеріңіз Орталық сайлау комиссиясы тіркеген сәттен басталды. Енді сіздер – елдегі заң шығару билігін жүзеге асыратын жоғары өкілді орган – Қазақстан Республикасы Құрылтайының депутаттарысыздар», – деді Әбдіров.

ОСК төрағасының орынбасары Мұхтар Ерман комиссия сайланған 145 депутаттың барлығын тіркеу туралы қаулы жобаларын әзірлегенін хабарлады. Отырыстың соңында депутаттарға куәліктері мен төсбелгілері табысталды.