Құрылтай Президентке министрлерді қызметтен босатуды ұсына алады

Қазақстанның жаңа Құрылтайына Үкіметке сенімсіздік білдіру және Президентке Үкіметтің жекелеген мүшелерін қызметтен босату туралы ұсыныс жасау құқығы берілді. Бұл туралы Президент Қасым-Жомарт Тоқаев Құрылтайдың алғашқы сессиясында айтты.

Мемлекет басшысының сөзінше, Құрылтай мемлекеттік басқару жүйесінде және билік тармақтарын қалыптастыруда маңызды рөл атқарады. Конституциялық сот судьялары, Орталық сайлау комиссиясы мен Жоғары аудиторлық палата мүшелері Құрылтайдың келісімімен тағайындалады.

Сондай-ақ депутаттар Президенттің ұсынуымен Жоғарғы сот судьяларын сайлап, оларды қызметінен босата алады. Құрылтай Конституциялық сот пен Жоғарғы сот судьяларын, сондай-ақ депутаттарды құқықтық иммунитеттен айыруға құқылы.

Бұдан бөлек, Құрылтай Үкімет пен Жоғары аудиторлық палатаның республикалық бюджет туралы есептерін бекітіп, Конституциялық соттың жыл сайынғы жолдауын тыңдайды.

«Бір сөзбен, Құрылтайға атқарушы және сот билігін қалыптастыруға, ел тағдырын айқындайтын стратегиялық маңызы бар мәселелерді шешуге қатысты аса ауқымды құзырет берілді», – деді Тоқаев.

Президенттің айтуынша, бұл өзгерістер заң шығарушы органның ықпалын едәуір күшейтіп, билік тармақтары арасындағы өзара теңгерімді нығайтады. Мемлекеттік және қоғамдық институттарды жаңғырту жұмыстары жыл соңына дейін жалғасады.