Құрылтай депутаттығына кандидаттарды ұсыну 2 шілдеде басталады

Орталық сайлау комиссиясы 23 тамызға белгіленген Құрылтай депутаттарын сайлау науқанының күнтізбелік жоспарын бекітті.

Орталық сайлау комиссиясы төрағасының орынбасары Мұхтар Ерманның айтуынша, кандидаттарды ұсыну 2 шілдеде басталып, 13 шілде күні сағат 18:00-де аяқталады. Ал партиялық тізімдерді тіркеу 23 шілде күні сағат 18:00-ге дейін жүргізіледі.

Сайлауалды үгіт-насихат жұмыстары 23 шілде күні сағат 18:00-ден кейін басталып, 22 тамыз сағат 00:00-ге дейін жалғасады. Сайлау учаскелерінің шекарасы 16 шілдеге дейін жарияланады, ал сайлаушылар тізімімен 7 тамыздан бастап жергілікті атқарушы органдарда танысуға болады.

22 тамыз – тыныштық күні. Ал дауыс беру 23 тамызда таңғы сағат 07:00-ден кешкі сағат 20:00-ге дейін өтеді.

Дауыс беру аяқталғаннан кейін аумақтық сайлау комиссиялары дауыстарды санауға кіріседі. Орталық сайлау комиссиясы сайлау қорытындысын он күн ішінде жариялауы тиіс.