Құрылтай депутаттары Маңғыстауда қаза тапқан сарбаздардың отбасыларына 146 миллион теңгеден астам қаражат бөлді

Маңғыстау облысында өтіп жатқан әскери оқу-жаттығу кезінде қайғылы жағдайда қаза тапқан және зардап шеккен әскери қызметшілердің отбасыларына Құрылтай депутаттары тарапынан ауқымды қаржылай қолдау көрсетілетін болды. Бұл туралы ұйымның Бюро отырысында ресми түрде хабарланды.

Алқалы жиын қызметтік міндетін атқару барысында қаза тапқан әскерилерді бір минуттық үнсіздікпен еске алудан бастау алды. Құрылтай Төрағасы Айбек Дәдебай орын алған қайғылы оқиғаның бүкіл халықтың қабырғасын қайыстырған ауыр трагедия екенін атап өтіп, марқұмдардың отбасылары мен жақындарына терең қайғырып көңіл айтты. Ол өз сөзінде Мемлекет басшысының Жарлығымен 25 қыркүйек Жалпыұлттық аза тұту күні болып жарияланғанын, бұл күллі елдің ортақ қайғысы екенін жеткізді.

Азаматтық пен жауапкершілік танытқан Құрылтай Төрағасы мен депутаттары зардап шеккендер мен қаза тапқандардың жақындарына көмектесу мақсатында жеке қаражаттарынан ерікті түрде қаржы жинау бастамасын қолдады. Қазіргі уақытта «Ұлттық рух» қорына аудару үшін 146 миллион 650 мың теңге көлемінде жеке қаржы жинақталды. Қайырымдылық акциясы әлі де жалғасып жатыр.

Атап айтқанда, депутаттар Айдарбек Ходжаназаров, Руслан Идрисов, Меирхат Қасымбаев, Бекжан Аййтқұлов, Махамбет Хасенов әрқайсысы 20 миллион теңгеден аударса, Дана Медеуова, Айжан Наимбекова және Бауыржан Джамалов 10 миллион теңгеден ақша бөлді. Сондай-ақ, Турарбек Тлемисов, Мұратбек Мұхамбедиев, Муса Хайруллиев 5 миллион теңгеден, ал Бегалы Ералиев 500 мың теңге көлемінде өз үлестерін қосты. Барлық жиналған қаражат белгіленген қор арқылы мұқтаж отбасыларға толықтай жеткізілетін болады.