"Күрті-Бұрылбайтал" автожолының учаскесінде қозғалыс ашылды

Бұл туралы "ҚазАвтоЖол" ұлттық компаниясы хабарлады.

Алматы облысы бойынша қайта жаңартудан өткен учаскенің ұзындығы – 81 шақырым. Тағы 85 шақырым учаскені қайта жаңарту жоспарланған. Учаске – "Орталық-Оңтүстік" дәлізінің маңызды бөлігі.

"Автожол екі бағытта төрт жолақты қозғалыспен қамтамасыз етілді, нәтижесінде автожолда жүру уақыты айтарлықтай қысқарды. Бұл өз кезегінде Қытай, Ресей мен Орталық Азия елдер арасындағы транзиттік тасымалдың өсуіне әсер етіп, Балқаш көліне қарай туристердің санының артуына септігін тигізбек", – делінген компания хабарламасында.

"Орталық-Оңтүстік" көлік дәлізі Алматы, Жамбыл және Қарағанды облыстарын байланыстырады. Оның халықаралық, облысаралық, жергілікті көлік және жүк тасымалын қамтамасыз етуде маңызы зор.