Күнге көп қыздырыну қандай аурулар тудырады?

Жаздың ыстық күндерінде жағажайда демалып, суға шомылуды ұнататындар көп. Алайда мамандар күнге көп қыздырынудың пайдасымен қатар зиянды жақтарына ерекше назар аударуды ұсынады, деп хабарлайды Qrnews тілшісі 24kz-ке сілтеме жасап.

Көпсалалы хирургия орталығының реконструкциялық және пластикалық хирургия секторының онколог, хирург, дерматологы Әнет Бейбіт күн сәулесінің астында ұзақ уақыт жүрудің тері ауруларын тудыруы мүмкін екенін айтады.

"Ең қарапайым түрі – фотодерматит күн сәулесінен пайда болатын ауру. Бұл ауру бізде көбінде бетке, мойынға және аяқ-қолдарға шығады. Бұл ауру арнайы мамандардың көмегімен емделеді", – дейді маман.

Күн сәулесінің ұзақ уақыт бойы әсер етуі тері обырына да әкелуі мүмкін. Тері обырының негізгі үш түрі бар: меланома, карцинома және базалиома. Әнет Бейбіттің айтуынша, олардың орталығына көбіне базалиома ауруымен келетін науқастар өте көп. Бұл ауру күн сәулесі астында ұзақ жылдар бойы жүргенде пайда болады.

Күн сәулесі тек тері обырын тудырып қана қоймайды. Ол теріні құрғатады, ерте қартаюға әкеледі және небір дақтар пайда болуы мүмкін. 

ІІ санатты онколог-хирург Назгүл Жантемірова ультракүлгін сәуленің терідегі зат алмасуды, қан айналымын жақсартатынын, «Д» дәруменінің көбеюіне себеп болатынын атап өтті. Алайда күн көзі өткір емес уақытта ғана жүру қажет.

Күннен қорғайтын жақпа майлардың пайдасы зор. Қорғау коэффициенті 50-ге тең жақпа майларды терінің қалқаны деп атауға болады. Бірақ олардың құрамын толық тексеріп, теріге сәйкес келетін түрін қолдану керек. Аққұба өңді адамдарда күйіктен сақтайтын табиғи қорғаныс аз. Олар үшін күннің қатерлі ісікке әкеп соғу мүмкіндігі қараторы адамдарға қарағанда әлдеқайда жоғары.