ҚУАНЫШБЕК БОТАБЕК - БАС РЕДАКТОРЛАР КЛУБЫНЫҢ РЕСМИ ӨКІЛІ

Астанада Қазақстан Республикасы Конституциясының 30 жылдығына арналғанбірнеше республикалық шаралар өткені белгілі.«Әділетті Қазақстан» республикалық ғылыми орталығы өткізген мерекелік шара барысында белгілі медиаменеджер, талантты журналист, HAN TV телекомпаниясы мен «Әділет.Рухани жаңғыру» республикалық газетінің басшысы Қуанышбек Тасболатұлы Ботабек қоғам дамуына қосқан айрықша еңбегі үшін «ҚАЗАҚСТАННЫҢ ҚҰРМЕТТІ ҚАЙРАТКЕРІ» медалімен марапатталды.

Сонымен қатар ол медиа саласына сіңірген еңбегі, ұйымдастырушылық таланты ескеріліп, еліміздегі ең танымал қоғамдық ұйымдардың бірі – Бас редакторлар клубының Түркістан облысы мен Шымкент қаласындағы РЕСМИ ӨКІЛІ болып тағайындалды.

Талантты қаламгердің іскерлік келбеті мен медиа басшысы ретіндегі қасиеттері туралы әріптестерінің пікірлері ақеділ тілектері де назар аударарлық.

Бибігүл Жексенбай, ҚР Парламенті Сенатының депутаты, Бас редакторлар клубының президенті: Өздеріңіз білетіндей, 15 жылдан астам уақыттан бері Бас редакторлар клубы қазақ журналистикасын дамыту бағытында жұмыстарын жүргізіп келеді. Республикалық, халықаралық деңгейлерде медиашаралар ұйымдастырды.

Біз ендігі кезекте өңірлердегі журналистиканы барынша өркендету, ондағы әріптестермен тығыз жұмыс істеуді қолға алмақпыз. Осы тұрғыда медианы өрге бастыруға мүдделі әріптестерімізді жұмылдырмақпыз.

Соның алғашқы қадамдарының бірі ретінде облыстарда қоғамдық ұйымымыздың өкілдерін белгілемекпіз. Бірінші қадам жасадық: әріптестерімізбен ақылдаса отырып, Түркістан облысы мен Шымкент қаласындағы ресми өкіліміз ретінде белгілі журналист, медиаменеджер, HAN TV телекомпаниясы мен «Әділет.Рухани жаңғыру» республикалық газетінің басшысы Қуанышбек Тасболатұлы Ботабек мырзаны бекіттік. Медианы өркендету бағытындағы қызметіне сәттілік тілеймін!

Мұратбек Тоқтағазин, Бас редакторлар клубының бірінші вице-президенті,Халықаралық Ақпараттандыру академиясының академигі: Расында өңірлердегі әріптестерімізбен жұмыс жүргізу ауадай қажет. Ол бір жағынан жергілікті жерлердегі әріптестеріміздің белсенділігі мен бастамашылығына да байланысты. Осы ретте оңтүстіктегі әріптесіміз, талантты журналист, іскер медиаменеджер Қуанышбек Ботабектің медианы дамытуға байланысты бастамалары көңілге қонымды. Сәттілік серік болсын, Қуанышбек Тасболатұлы!

Абай Балажан, «Оңтүстік Қазақстан» газетінің бас редакторы, ҚР Президентінің БАҚ саласындағы сыйлығының лауреаты: Өте дұрыс бастама! Ал, Қуанышбек Ботабеков қолынан іс келетін жігіт! Қолдаймыз!

Нұрбол Төлебаев, Бас редакторлар клубының вице-президенті,  http://qrnews.kzпорталының директор - бас редакторы: Ресми өкілдердің тағайындалуы клубтың беделін арттырып, қызметін жаңа деңгейге көтеретініне сеніміміз мол! Ақпарат саласы мен медиа кеңістігінде үлкен тәжірибесі бар Ержан Қалымбайұлы Алматы қаласындағы, ал Қуанышбек Ботабек Түркістан облысы мен Шымкент қаласындағы Бас редакторлар клубының ресми өкілдері болып тағайындалуын қуанышпен қабылдадық. Осы игі бастама құтты болып, жаңа қызметтеріңіз бен алдағы жұмыстарыңызға табыс пен сәттілік тілейміз!

Ержан Қалымбайұлы, «Alatau Aqparat» медиахолдингінің Бас директоры:   Қуанышбек Тасболатұлын отандық журналистиканың дамуында өзіндік қолтаңбасы бар, Оңтүстік өңірдегі мықты медиаменеджерлердің бірі ретінде жақсы білеміз. Құттықтаймын, сәттілік тілеймін!

Жанай Амантурлин, Индер аудандық “Дендер” газетінің бас редакторы, Атырау облыстық Бас редакторлар клубының төрағасы: Өңірлердегі журналистерді қолдап, оларға заманауи жетіліп отыру бағытында ақыл-кеңес беріп, білікті әріптестеріміз дәріс оқығаны жақсы. Бізде осы тұрғыда ойланып жүргенбіз. Ал Қуанышбек бауырымызды сырттай жақсы білеміз. Қолынан іс келеді деген сенімдеміз. Сәттілік тілейміз.

Соңғы кездері Бас редакторлар клубының жұмыстары одан әрі жандана түсті. Қоғамдық ұйым Астанада ғана емес, республикамыздың әртүрлі өңірлерінде де шаралар өткізіп, қолдау білдіріп келеді. Сонымен қатар бірқатар медиа жобаларды жүзеге асыра бастады. Сол игі істердің жүзеге асуына медиа басшысы Қуанышбек Тасболатұлы да сүбелі үлесін қосып жүр. Алдағы уақытта жүзеге асырылған іс-шаралар туралы кеңірек жазатын боламыз.

Шаттық Сәдуақас,

Халықаралық Журналистер одағының мүшесі