Қостанайда TikTok-та ұлтаралық араздықты қоздырды деп айыпталған әйелге үкім шықты

Қостанай қаласының №2 соты 44 жастағы тұрғын Юлия Хонды ҚР Қылмыстық кодексінің 174-бабының 1-бөлігі бойынша кінәлі деп таныды. Сот оны әлеуметтік және ұлтаралық араздықты қоздырды деп бағалап, тиісті жаза тағайындады. Бұл жөнінде Tobolinfo хабарлады.

Іс деректеріне сәйкес, 2024 жылдың қараша айының басында түнгі уақытта, шамамен сағат 03:45-те, айыпталушы мас күйінде TikTok платформасында өткен тікелей эфирге қатысқан. Эфирде Ресей мен Украина арасындағы соғыс мәселесі талқыланған. Сол сәтте Юлия Хон бейәдеп сөздер айтып, ұлттық белгісі бойынша қорлайтын пікірлер білдірген. Тергеу бұл әрекеттерді ұлтаралық алауыздық тудыруға бағытталған деп есептеген.

Істі қараған судья Ольга Кузнецова айыпталушының кінәсі тікелей эфирдің бейнежазбасымен, сараптама қорытындыларымен және куәгерлердің айғақтарымен толық дәлелденгенін атап өтті.

Сот шешімімен Юлия Хон екі жылға бас бостандығынан айырылып, жазаны қауіпсіздігі ең төмен колонияда өтейтін болды. Бұған дейін ешқайда кетпеу туралы міндеттеме алған ол үкім жарияланған соң сот залында қамауға алынды.

Жаза тағайындау кезінде сот жеңілдететін мән-жайларды да ескерді. Атап айтқанда, сотталушының асырауында жол-көлік оқиғасынан кейін көру қабілетінен айырылған ұлы бар, оның емделу шығындарын өзі көтеріп келеді. Сондай-ақ Юлия Хон тұрмыста, тұрақты жұмысы бар және бұрын қылмыстық жауапкершілікке тартылмаған.

Үкімге сәйкес, ол 826 мың теңге көлеміндегі процестік шығындарды өтеуге міндеттелді.

Қорғау тарапы тікелей эфир барысында Юлия Хонның өзі де қорлық көргенін, ал айтылған сөздер тұтас бір ұлтқа емес, нақты адамға бағытталғанын алға тартты. Адвокат үкімге шағым түсірілетінін мәлімдеді.