Қостанай облысында өрттен бір үйдің бес баласы қаза тапты

Қостанай облысының Жітіқара қаласында жеке тұрғын үйдегі өрттен бес бала қаза тапты, деп хабарлады облыс әкімдігінің ақпараттық штабы. Қазір сотқа дейінгі тергеу амалдары жүргізіліп жатыр.

Әкімдіктің мәліметінше, төтенше жағдай жұма күні сағат 4:29-да болған. Өрт салдарынан үйдің шатыры опырылып түскен.

«Шатыр құлаған кезде үйде ересектердің қарауынсыз 2011, 2016, 2018, 2019, 2022, 2023 жылы туған кәмелетке толмаған балалар болған. Өкінішке қарай, үйінділерді тазалау кезінде бес баланың денесі табылды. 2011 жылы туған ең үлкен бала зардап шеккен жоқ», - делінген хабарламада.

Алдын ала мәлімет бойынша, балалардың анасы кешкісін танысына кеткен. Күйеуі бас бостандығынан айырылған.

«Қазіргі таңда өрттің себебі анықталу үстінде. Өрт-техникалық сараптама тағайындалды. Құтқару медицинасы орталығының психологтары балалардың туыстарына қажетті психологиялық көмек көрсетіп жатыр. Жергілікті атқарушы органдар барлық қажетті көмек, оның ішінде материалдық қолдау көрсететін болады», – деп мәлімдеді әкімдік өкілдері.

Бұл ретте Қостанай облысының прокуратурасы өрттің алдын ала себебін «пешті қараусыз қалдыру» деп хабарлады. Сотқа дейінгі тергеу басталды.