«Қосшыдан басшы көп»: Тоқаев «Самұрық-Қазына» мен ұлттық компания басшыларын қатаң сынға алды

Мемлекет басшысы Қасым-Жомарт Тоқаев Үкіметтің кеңейтілген отырысында квазимемлекеттік сектордағы басқару жүйесін түбегейлі қайта қарауды талап етті. Президент ұлттық компаниялардағы «бос жүрген» басшылардың көбейіп кеткенін ашық айтты.

«Сол жағалаудың» адамдары және әлеуметтік желідегі дау

Президенттің айтуынша, ұлттық компаниялар мен «Самұрық-Қазына» қорының басшылық құрамы шамадан тыс ісініп кеткен. Ол басшылардың көбі нақты іспен емес, бос уақытын әлеуметтік желідегі тартыстарға жұмсайтынын айтып, шүйлікті.

«Қосшыдан басшы көп. Басшылық құрамы ел айтып жүргендей «Сол жағалаудың» адамдарына толып қалған. Олардың жұмысқа көміліп жатқан ештеңесі жоқ. Кейде не істерін білмей, әлеуметтік желілерде әркіммен пікір таластырып отырады. Бұл түбі жақсылыққа апармайды», – деді Қасым-Жомарт Тоқаев.

Құрылымды қайта қарау – басты талап

Мемлекет басшысы «Бәйтерек» холдингі мен «Самұрық-Қазына» қорына нарықтық бастамаларды шектемей, жеке бизнеспен серіктес ретінде жұмыс істеуді міндеттеді. Президент компаниялардың құрылымын заман талабына сай жаңартып, тиімділікті арттыру қажеттігін қадап айтты.

Инвестициялық басымдықтар

Сонымен қатар, Президент Қазақстанның жаһандық бәсекедегі артықшылықтарын пайдалануды тапсырды. Болашақта инвестиция мына салаларға бағытталуы тиіс:

• Сирек кездесетін металдарды өндіру (Батыс инвесторларының қызығушылығы жоғары);

• Мұнай-газ химиясы және агроөңдеу;

• Цифрлық инфрақұрылым және жаңартылатын энергия.