Көшпенділер ойындарындағы дауға нүкте қойылды: Қазақстан – бірінші орында

Қырғызстанда өткен VI Дүниежүзілік көшпенділер ойындарының ұйымдастыру комитеті медальдарды қайта есептеп, Қазақстан құрамасының жалпыкомандалық есепте бірінші орын алғанын хабарлады. Бұған дейін екі түрлі қорытынды кестенің тарауы Қазақстан мен Қырғызстан жанкүйерлері арасында пікірталас туғызған еді.

Қырғызстан президентінің баспасөз хатшысы Асқат Алагөзовтің мәлімдеуінше, жалпыкомандалық есептегі сәйкессіздік медальдарды санау кезіндегі техникалық қателіктен болған. Ұйымдастыру комитеті Қазақстанның үш спортшысы алған жүлделерді жеке-жеке есепке алу туралы шешім қабылдаған.

«Осылайша жалпыкомандалық есепте бірінші орынды Қазақстан иеленді. Қазақ бауырларымызды жеңісімен құттықтаймыз!» – деп жазды Алагөзов.

Бұған дейін Көшпенділер ойындарының қорытындысы бойынша екі түрлі кесте тараған. Қазақстандық тараптың дерегінде ұлттық құрама 32 алтын медальмен бірінші орында тұрса, ұйымдастырушылар жариялаған кестеде Қазақстанға 29 алтын жазылып, Қырғызстан бірінші орынға шығарылған еді.

Қазақстандық журналистер жарыстың соңғы күні Қазақстан спортшылары жеңіп алған үш алтын жүлде қорытынды есепке кірмей қалғанын айтқан. Атап айтқанда, тоғызқұмалақтан алынған екі алтын мен мангаладан иеленген бір алтын есептелмегені хабарланған.

Даудан кейін Көшпенділер ойындарының ресми парақшасында жарияланған медаль кестесі өшірілді. Қырғызстанның Дене шынықтыру және спорт агенттігі жарыс тұжырымдамасына сәйкес елдер арасында жалпыкомандалық медаль есебі жүргізілмейтінін де мәлімдеген еді.

Енді ұйымдастыру комитеті медальдарды қайта қарап, Қазақстанды жалпы есептің жеңімпазы деп таныды. Асқат Алагөзов Қырғызстан спортшыларының да жарыста жоғары нәтиже көрсеткенін атап өтті.

Ол медаль есебі спорттың бір бөлігі ғана екенін айтып, ойындардың басты нәтижесі Қазақстан мен Қырғызстан спортшылары арасындағы өзара құрмет пен әділ бәсеке болғанын мәлімдеді.