Қошанов: Үкімет Мәжілісте қарсы болған түзетулерді Сенатта қолдайды

Мәжіліс төрағасы Ерлан Қошанов сегізінші шақырылымдағы Қазақстан Республикасы Парламентінің үшінші сессиясының жұмысын қорытындылай келе, Үкімет пен Парламент арасындағы өзара іс-қимылдағы бірқатар жүйелі проблемаларға тоқталды. Оның айтуынша, бұл мәселелер жыл сайын қайталанып келеді.

«Қосымша қаржы талап ететін түзетулер бойынша заңға сай Үкіметтің қорытындысы қажет. Өкінішке қарай, бұл қорытындыны дайындау процесі тым ұзаққа созылып барады. Кейде бұл жеті айға дейін жалғасады. Мұның салдарынан Мемлекет басшысының тапсырмаларын уақытылы орындау мен халық күтіп отырған маңызды заңдарды қабылдау тежеліп қалады», – деді Қошанов қос палатаның бірлескен отырысында сөйлеген сөзінде.

Ол сондай-ақ Үкіметтің кей жағдайларда депутаттық бастамаларға нақты ұстаным білдірмейтінін сынға алды. Мәселен, ерекше қорғалатын табиғи аумақтар туралы заң жобасын талқылау кезінде депутаттар Жер кодексінің бір бабына қатысты екі түрлі тәсіл ұсыныпты. Алайда Үкімет екеуіне де қолдау білдірген. Мәжіліс төрағасы мұндай мысалдар аз емес деді.

Сонымен қатар Қошанов мемлекеттік органдардың бірізді әрекет етпеуіне назар аударды.

«Депутаттардың түзетулерін Мәжілісте қолдамаған Үкімет, сол түзетулер Сенатқа жеткенде, аяқ астынан қолдау білдіреді. Бұл – қорытынды дайындау ісіне үстірт қараудың белгісі», – деді ол.

Мәжіліс төрағасы министрліктердің заң жобаларын өздері әзірлеудің орнына депутаттар арқылы немесе Парламентке хат жолдау арқылы мәселелерді шешуге тырысатынын айтты.

«Кейде мұндай ұсыныстар жалпы отырыс болатын күні ғана келіп түседі. Бұл сессияда Үкіметтің мұндай хаттарының саны екі есе артқан. Бірақ бұл механизм тек ерекше жағдайларға – Мемлекет басшысының жедел тапсырмаларына немесе шұғыл шешімді қажет ететін мәселелерге арналған», – деді Қошанов.

Ол мұндай тәжірибе заң жобаларын қарау сапасына кері әсер ететінін айтып, Үкіметті заң шығару процесіне мұқият әрі жүйелі түрде қатысуға шақырды.